- أنا هيك وقاحه بعد ماشفت! - ايه مبروك هي شفتي - دخلك والله ماعدت فهمت شو يعني حرمان؟ ومين المحرومين؟ - هو ماقال محرومين! قال محرومين من عائدات النفط! - لكان كل هالفلوس اللي ولاده عم يكبوها ببارت و خمارات اوروبا من وين؟ - يمكن من حليب النوق! - آه قطيع بعارين أبوه يعني؟ - لا شو أبوه، هادا اشتراكي ما عنده وراثة ثروات برجوازية..بس بتعرفي البعارين بيتكاثروا لحالهن الله يزيد ويبارك - سبحان الله، ايه لكان لروح اشتريلي ناقة انا التانية - ايه ترى مشروع مربح هه، خصوصاً إذا كنتي اشتراكية التوجه..اسأليني أنا عن المشاريع الاشتراكية... ولوووووو - ايه بصير اشتراكية شو عليه - ايه ويلكم ابورد :-) - ليش انتى اشتراكي انت التاني؟؟؟ ليه بتظلك مفلس لكان؟؟ - مفلس لأني جيت على هالبلد الامبريالي يا هبلة !!!!!!!!!!حيث الرأسمالية المقيتة، واستغلال الإنسان لأخيه الإنسان - ايه ماتواخذنا، نحنا مابنوزع عائدات النفط عالاسر المحرومة اللي عايشة على حليب النوق!! - ايه خليني ساكت... ما بدي أحكي كمان عن صياعة جماعتكن بأوروبا!!! ضاقت عينك على هالكادحين ما هيك؟؟؟؟ يا لطيف عالحقد الطبقي....هي أنت ذاتك طالعة الشهر الجاية تصيعي بأوروبا... قولي لي دخلك إيمتى آخر مرة حلبتي ناقة؟؟؟؟ آه...؟؟؟ جاوبي ايمتى؟؟؟؟ - انا عمري ماحلبت ناقه ولا حتى قربت منها عشرتمتار.. على قولتك نحنا ناس برجوازين - شفتي شلون!!!! وطالعة تتمردحي باوروبا من قوت هالشعب المسكين!!!!! - بتعرف، أنا بدي جيب ناقة للتمويه لحتى إذا حدا زنقني قله من حليب النوق.. بلكي بنصير اسر محرومة كمان وبعدين بيطلعلي اشتري فريق كرة قدم انا التانية..وصاحب واحد فرنساوي حليوه, ولا لا، شو فرنساوي، بجيب براد بت كله ع بعضه.. بشتريه من انجلينا جولي! - ايه ايه روحي أنت اشتريه منها بيخلالي الجو..وباخدها ببلاش ;-) - يي عليك شو زكي، وهيك بنطلع احنا الاتنين رضيانين...دخلك كم ليتر حليب نوق بدي لحتى طالع حقه لبراد بت؟؟؟
ما بعرف إذا كنت بعدك متذكر عنواني ..
ما بعرف إذا بيهمك تعرف انه عم أتذكرك أوقات.. مع إنّــا كتير صارت قليلة ونادرة..
أو إذا لقيت حدا يتحمل مزاجك و يعيش ع هواك.. حدا تعلقه فيك و تفل.. متل عادتك!!
مع انه عمره ما عنـالك الورد الأحمر شي.. ومع إنك ما عدت أنت حبيبي..
زرعت شهرزاد في جمجمتي نسمة هواء تصاعدت حتى أصبحت ريحاً حملت معها الغيم فأمطر هنا.. *********************** مساكن الغيم سكن الغيم في الماضي تاء تأنيث ساكنة، ملحقةً بفعلٍ ماضٍ هو استسلم! مقفرة كانت صحراؤه.. ولم يحمل من المطر إلا رائحته و سراب حضوره الخانق! من عليائه كان يرى المحيط، ويعرف أنه في ذلك المكان يستطيع أن يكون غيماً حقيقياً.. قرر الغيم يوماً أن يتمرد على الفعل والفاعل والمفعول به... ويتحدى كل محاولات النصب والجر! فيسكن تاءاً ثائرةً مرفوعة، برغم كل قواعد اللغة، تحمله إلى محيطاتٍ وأنهارٍ يرتوى من بخرها.. ليعود فيمطر نون نسوةٍ مرفوعة الهامة!
سألتني ريــــم.. ليه ماعم حط شي بالبلوغ هالأيام؟؟ ريــــم، بتعرف ليه! بس بيحلالها احيانا "تهز الورد لتشم ريحته" أو "تتحركش بالحمى لتجيها البردية" صديق آخر (لولو، وحياتك ما جنيت!!) بيحلاله هو التاني "يهز الورد ليشم ريحته" ! (حسب اعترافاته الشخصية) سألني هيك من قلب الدني.. أنه ليه ما بجرب اكتب أغاني؟ برأيه أن عشقي للأغاني الذي يعرفه الجميع، و كتاباتي التي يحبها هو أكثر مني في أغلب الأحيان.. عاملان مشجعان!!!!! أنا؟؟؟؟ أكتب أغاني؟؟؟؟؟!!!!! هممممممم، ليش لا، بكتب أغاني.. في نهاية اليوم راح يطلع معي شي أحسن بشوي من "واوا".. و"عتريس" (بتخيل)!!! بس لازم حط اسم مستعار جديد ماحدا بيعرفه، شي متل الأسم المستعار اللي بلش فيه خالد الفيصل (شاعر وأمير سعودي مهم للي ما بيعرفه!!) خالد الفيصل بدا باسم دايم السيف! الحلو بأسمه المستعار انه "ترجمة" لأسمه الحقيقي!! خالد=دايم ، الفيصل=السيف شو بيطلع اسمي المستعار عهالأساس ؟؟؟ سلوى الأمين!؟!! يووو.. مش فني أبدا... مين راح يغني لوحده اسمها سلوى الأمين؟! بخليها ديــــــــم أحلى بكتير. ماهيك؟ وبكره بس بلش بدي صير مشهورة كتير..وراح يغنولي كلن.. حبيبة قلبي نانسي عجرم، راح اكتبلا غنية خصوصي... تقبشني!! وفضل، ييييي أكيد.. وراغب وأليسا.. بدي اعملن ديو متل هداك تبع السرير بس هالمرة بنصوره عالكنبه!!! وبعدين بدي انشهر اكتر واكتر و بدا تغنيلي ماجده.. وكاظم.. وفيروز.. وحتى عبدالحليم واسمهان وام كلثوم .. يييي هدول ميتينن!!! عفوا.. عفوا.. الظاهر سرحت كتير ... ........ دخيله ما أحلاه المطر.. عم يخبط عشباكي.. لا .. لا .. ماتروحوا بعيد هي مش أول غنية.. هي حقيقة.. المطر يغني على شرفتي!!! أعتقد أني تحدثت كثيرا عن علاقتي أنا والمطر من قبل.. لذلك فسأنهي هذا الهذيان هنا.. و أنصرف لهذيان من نوع آخر.. بيني وبين المطر.. والعاصفة الرعدية التي أتت معه! أعرف أني سأنام الليله سعيدة!
(الأمر الذي يعتمد لحد كبير على ما سيظهر عليه هذا الموضوع في النهاية)!!!
بعد مـا رديت على "تــاغ" سارا.. سألني "واحد ظريف": " شو الهيئة معصبة؟" ارتسمت "العقدة" التي يعرفها جيدا على وجهي، وسألته "ليه؟" صديقي الظريف أحس بان أسلوبي في الرد على موضوع الـ "تــاغ" كان "كتير ناشف"، وقال أني في العادة "بنكت ع حالي كتير" بس احكي عن حالي!! الأمر الذي كان مفقودا في ردي على سارا. بس أنا ظليتني مصرة انه "ما بني شي"... واليوم سألني "واحد ظريف تاني".. عن قصة التاغ.. ولماذا لم أحوله بدوري لآخرين؟ هالمرة ما حطيت عقد!! واكتشفت انه ربما كنت فعلا "معصبة" من دون أن انتبه، "من شي ما بعرف شو هو"!!!! فيكن تفكروا إني مجنونة.. بسمحلكن! والآن أشعر بأني مدينة باعتذار صغير لسارا، فقد انتبهت أني حتى لم أشكرها على التمرير.. ولأني مثلما قال صديقي الظريف الأولاني رديت ع "التاغ" كأنه "وظيفة مدرسة"! والآن اسمحوا لي أن أمرره بدوري إلى: و شهرزاد... و Jetama و زينب و ايف (اذا مزاجن بيسمح!)
<<الصفحة الرئيسية